Matthías Hrafn Þórarinsson lést þann 28. ágúst síðastliðinn á Barnaspítala Hringsins, aðeins sex ára að aldri. 

Matthías Hrafn fæddist með sjaldgæfan vélindagalla og fór í yfir 130 aðgerðir á sinni stuttu ævi. 

„Hann bar sig ávallt vel og vann hug og hjarta allra sem honum kynntust og kann fjölskyldan starfsfólki barnaspítala og gjörgæslunnar þar sem hann dvaldi mikið á hverju ári mikla þökk,“ segir Karen Dagmar Guðmundsdóttir móðir Matthíasar.

Matthías bjó ásamt fjölskyldu sinni, foreldrum, systur og tveimur bræðrum í Hveragerði. Tók það mikið á fjárhag fjölskyldunnar að halda tvö heimili í sex ár þar sem heilsufar Matthíasar bauð ekki upp á að geta verið heima hjá sér í Hveragerði meiri hluta ársins.

Faðir hans, Þórarinn Gíslason, lést í desember, og varð þá enn erfiðara fyrir móður hans að halda öllu gangandi.

„Hjarta mitt er brotið,“ segir Karen, en söfnuninni er deilt með góðfúslegu leyfi hennar.

Vinir fjölskyldunnar hafa sett af stað söfnun fyrir fjölskylduna á þessum erfiða tíma.

Söfnunarreikningurinn er á nafni móður Matthíasar, Karen Dagmar Guðmundsdóttur.

Þeir sem vilja styðja við fjölskylduna geta lagt inn á neðangreindan reikning. Munum að margt smátt gerir eitt stórt.

Kennitala: 1910785519
Reikningur: 0314-22-1111