Réttarhöldin yfir manninum sem kýldi Mette Fredriksen, forsætisráðherra Danmerkur, í júní eru hafin. Maðurinn segist ekki muna mikið vegna áfengis og vímuefnanotkunar. Hann er einnig sakaður um kynferðisbrot og fjársvik.
Maðurinn er 39 ára gamall Pólverji sem fluttist til Danmerkur árið 2019. Hann hefur verið í gæsluvarðhaldi síðan hann var handtekinn þann 7. júní síðastliðinn fyrir að kýla Fredriksen í upphandlegginn á götu úti í miðborg Kaupmannahafnar. Hún var að tala í síma þegar maðurinn veittist að henni og sagði eitthvað sem hún skyldi ekki.
Forsætisráðherrann fékk hnykk eftir höggið en hún mun ekki mæta fyrir dóminn eins og segir í frétt Ekstrabladet. Það gerði hins vegar lífvörður hennar sem vitnaði um að maðurinn hefði kýlt hana.
„Í þessum aðstæðum virtist hann vera reiður,“ sagði lífvörðurinn sem gaf einungis upp númer sitt, KF081.
Verjandinn segir að hinn ákærði lýsi yfir sakleysi sínu í málinu. Hann myndi ekki mikið eftir atvikinu vegna ölvunar og fíkniefnaneyslu sinnar.
Maðurinn er ekki aðeins ákærður fyrir líkamsárás á forsætisráðherrann. Hann er einnig ákærður fyrir kynferðisbrot og fjársvik. Það er að hafa berað sig á götu úti fyrir framan fólk og að hafa káfað á konu í lest. Einnig að hafa reynt að svíkja út fé úr stórverslunum með skilamerktum flöskum og dósum. Ólíkt árásinni á forsætisráðherrann hefur maðurinn gengist við þessum brotum.
Ekki er búist við því að réttarhöldin taki langan tíma. Hugsanlega gæti niðurstaða legið fyrir í málinu strax á morgun, miðvikudag.
