Skiptalok hafa orðið í byggingafyrirtækinu Örk Bygg en tilkynning um þetta birtist í Lögbirtingablaðinu í gær, 13. maí. Þær eignir sem fundust í búinu fóru upp í skiptakostnað en ekkert greiddist upp í lýstar kröfur. Lýstar kröfur voru yfir 320 milljónir, eða 322.793.266 kr.

Félagið var lýst gjaldþrota í febrúar árið 2023. Eigandi er Ásgeir Arnór Stefánsson. Síðasta sumar var hann sakfelldur í Héraðsdómi Reykjavíkur fyrir skattsvik í rekstri fyrirtækisins. Vanskil fyrirtækisins á staðgreiðslu skatta af launum starfsmanna þess námu nokkuð yfir 80 milljónum króna. Ásgeir játaði brot sín fyrir dómi og var dæmdur 14 mánaða skilorðsbundið fangelsi. Hann var jafnframt dæmdur til að greiða rúmlega 152 milljónir í sekt í ríkissjóð eða sitja ella í fangelsi í eitt ár.

Eins og DV hefur áður greint frá var Örk miðpunktur í frægu slysi í miðborginni árið 2016 en þá hrundi byggingarkrani sem fyrirtækið var með á leigu í Hafnarstræti. Stórhættulegt atvik og mildi að ekki urðu slys á fólki.