Tveir litáheskir menn sem grunaðir eru um að hafa orðið landa sínum að bana við sumarbústað í Kiðjabergi í Árnessýslu þann 20. apríl síðastliðinn hafa verið úrskurðaðir í framlengt gæsluvarðhald til 10. maí.

RÚV greinir frá.

Upphaflega voru fjórir menn handteknir vegna láts mannsins en tveir voru látnir lausir.

Hinn látni var fæddur árið 1987 og hafði verið hér á landi við störf í byggingarvinnu í þrjá mánuði. Hann á kærustu í Litháen sem fékk upplýsingar um lát hans í gegnum lögreglu þar í landi.

DV ræddi fyrir skömmu við besta vin hins látna, litháeskan mann sem býr og starfar í Noregi. Sá maður er einnig í sambandi við kærustu hins látna í Litháen. Hann hefur eftir henni að hinn látni hafi hringt í hana um hálfníuleytið á laugardagsmorguninn og sagst hafa fallið úr stiga og brotið rifbein. Laust fyrir kl. 14 sama dag kom lögregla á vettvang og þá var maðurinn látinn.