Engin söfnun er í gangi fyrir börnum fjölmiðlamannsins Hrafns Jökulssonar, sem féll frá í september 2022. Þetta áréttar Illugi Jökulsson, bróðir Hrafns, í færslu á Facebook-síðu sinni. Tilefnið er að óprúttnir aðilar eru sagðir ganga í hús og safna peningum í þetta tiltekna málefni.

Illugi varar við þessu og biður fólk að dreifa því sem til flestra að varast þessa aðila sem reyna að hafa minningu Hrafns, sem var elskaður og dáður af fjölda fólks, að féþúfu.

„Börnunum hans Hrafns bróður míns hefur borist til eyrna að einn eða tveir menn gangi um þessar mundir í hús eða gefi sig jafnvel að fólki á götum úti, biðji um fé og segist vera að safna peningum til styrktar þeim fjórum. Af því tilefni vilja þau að fram komi að engin slík söfnun er í gangi á þeirra vegum, þau vita ekkert um þetta og þeim væri heldur engin þægð í slíkri söfnun,“ skrifar Illugi á Facebook-síðu sína.