Vladimír Pútín Rússlandsforseti gaf Kim Jong-un, einræðisherra Norður-Kóreu, veglega gjöf á dögunum. Um var að ræða splunkunýja bifreið sem framleidd er í Rússlandi en ekki liggur fyrir af hvaða tegund bifreiðin er.

Ríkisfjölmiðill Norður-Kóreu greinir frá þessu að því er fram kemur í frétt AP-fréttaveitunnar.

Átti gjöfin að vera til marks um vináttu leiðtoganna tveggja og gott samband Rússlands og Norður-Kóreu. Efnahagsþvinganir eru í gildi gagnvart Norður-Kóreu  vegna kjarnorkuáætlunar yfirvalda og kemur fram í frétt AP að gjöfin gæti verið brot á samþykktum Sameinuðu þjóðanna.

Í frétt AP kemur fram að Kim Yo Jong, systri einræðisherrans, og annar ónafngreindur embættismaður, hafi veitt gjöfinni viðtöku á sunnudag.

Norður-Kórea og Rússland hafa átt í ríkum samskiptum síðustu mánuði, eða allt síðan Kim heimsótti Rússland í september á síðasta ári og hitti þar meðal annars Pútín.

Í þeirri heimsókn fékk Kim meðal annars að setjast aftur í Aurus Senat-limmósínu Pútíns en um er að ræða fyrstu lúxusbílategundina sem framleidd er í Rússlandi.

Kim Jong-un er mikill bílaáhugamaður og er hann sagður eiga glæsilegt safn lúxusbifreiða, meðal annars frá Evrópu, sem smyglað hefur verið til landsins.