Tómas Guðbjartsson, skurðlæknir á Landspítalanum, er kominn í leyfi frá störfum sínum. RÚV greinir frá þessu og segir að ástæður leyfisins tengist plastbarkamálinu svokallaða. Vísir segir að Tómas hafi sjálfur óskað eftir því að fara í leyfi.

Í frétt RÚV kemur fram að staða Tómasar og framtíð hans innan spítalans sé í skoðun hjá æðstu stjórnendum. Kemur fram að allnokkrir þeirra telji að Tómas þurfi að sæta ábyrgð í plastbarkamálinu og hreinlega hætta störfum. Spítalinn verði að gera málið upp og sú vinna standi yfir.

Fyrsti plastbarkaþeginn var sjúklingur Tómasar og hét Andemariam Beyene. Hann lést árið 2014 eftir að hafa greinst með alvarlegt krabbamein í barka. Hlaut hann læknismeðferð hér á landi og síðar í Svíþjóð þar sem græddur var í hann plastbarki.

Plastbarkinn, hjúpaður stofnfrumum, var græddur í sjúklinga til að koma í veg fyrir að líkaminn hafnaði barkanum. Síðar kom í ljós að þessi vísindi voru byggð á sandi og enginn eðlilegur frumuvefur myndaðist utan um barkana.

Tómas hefur lýst því yfir að læknirinn sem hafði veg og vanda að plastbarkaígræðslunum, Ítalinn Paolo Macchiarini, hafi platað sig í aðdraganda þess að plastbarki var græddur í sjúkling hans.