Í frétt BBC nú fyrir stundu kemur fram að Harry prins, yngri sonur Karls konungs Bretlands, hafi tapað dómsmáli sem hann höfðaði eftir að löggæsluyfirvöld neituðu að veita honum og fjölskyldu hans lögregluvernd þegar þau væru stödd á Bretlandi. Hann fór fram á að greiða kostnaðinn fyrir verndina úr eigin vasa en því var hafnað og þá höfðaði hann málið.
Upphaflega hætti lögreglan að gæta öryggis Harry vegna þess að hann og eiginkona hans, Meghan, hættu reglulegum daglegum störfum sem hluti af konungsfjölskyldunni.
Lögfræðingar í innanríkisráðuneyti Bretlands höfnuðu því að veita það fordæmi að auðugt fólk gæti keypt sér lögregluvernd. Lögmenn prinsins vildu meina að það væri ákvæði í lögum sem heimiluðu greiðslur fyrir sérstaka þjónustu lögreglunnar og að slíkt gengi ekki í berhögg við almannahagsmuni eða traust almennings á lögreglunni.
Það hefur tíðkast í fjölda ára á Bretlandi að lögreglan veiti þjónustu gegn greiðslu. Þar má nefna löggæslu á stórum viðburðum eins og t.d. fótboltaleikjum og tónleikum. Lögfræðingar ráðuneytisins vildu þó meina að það væri ekki sambærilegt við að veita tilteknum einstaklingum vernd gegn greiðslu. Lögreglan vildi enn fremur meina að það byði hættunni heim fyrir lögreglumenn ef slíkt yrði heimilað.
Innanríkisráðuneytið segir það einfaldlega opinbera stefnu að auðugir einstaklingar eigi ekki að geta keypt sér lögregluvernd.
Í júlí verður það þó tekið fyrir á æðra dómstigi hvort að löglega hafi verið staðið að hinni upphaflegu ákvörðun um að svipta Harry lögregluverndinni.
