Guðmundur Benediktsson, íþróttafréttamaður segir að það yrðu frábær tíðindi ef Gylfi Þór Sigurðsson myndi snúa aftur á knattspyrnuvöllinn og spila aftur fyrir íslenska landsliðið.

Gylfi hefur ekki spilað fótbolta í að verða tvö ár vegna rannsóknar lögreglunnar í Manchester, var hann grunaður um brot gegn ólögráða einstaklingi.

Eftir 637 daga í rannsókn var málið látið niður falla og er Gylfi nú frjáls ferða sinna. Var hann í farbanni á Englandi á meðan málið var til rannsóknar.

„Fyrst og fremst er maður ákaflega ánægður fyrir hönd Gylfa, að það sé komið einhver niðurstaða í þetta mál. Þetta hefur eðlilega verið erfitt fyrir alla og þá sérstaklega hann. Ég held að það sé of snemmt að tjá sig um að Gylfi komi aftur í landsliðið, Vanda sagði að það væri næst á dagskrá að heyra í Gylfa og skoða málin,“ sagði Guðmundur á Bylgjunni í dag.

Það var ákvörðun Everton að Gylfi myndi ekki spila  á meðan rannsóknin var í gangi og þá var honum meinað að æfa með liðinu. Hann varð samningslaus síðasta sumar.

„Miðað við umfang þessa máls hingað til, að Gylfi og hans fólk þurfti tíma til að átta sig á stöðunni. Það eru frábærar fréttir fyrir að hann að það sé búið að fella málið niður.“

Guðmundur segir að Gylfi sé besti landsliðsmaður sögunnar en það sé ótímabært að ræða endurkomu hans í landsliðið.

„Hann hefur ekki spilað fótbolta í mjög langan tíma og það tekur allt saman tíma, ef að yrði að Gylfi myndi spila aftur fyrir Ísland þá væru það frábærar fréttir fyrir Ísland. Við höfum aldrei átt betri landsliðsmenn í treyjunni, en það er of snemmt að vera með yfirlýsingar um það. Vonandi gengur þetta allt vel.“