Heimsmeistaramótið í hraðskák fer fram í dag í Almaty, höfuðborg Kasakstan. Í gær lauk heimsmeistaramótinu í atskák og hafði Norðmaðurinn ótrúlegi, Magnus Carlsen, þar öruggan sigur.
Carlsen er frábær hraðskáksmaður og ætlar sér stóra hluti í hraðskáksmótinu. Sú ótrúlega atburðarás átti sér hins vegar stað að þegar fyrsta umferð mótsins hófst sást Carlsen hvergi. Andstæðingurinn var hvíttrússneski stórmeistarinn Vladislav Kovalev, sem er afar öflugur skákmaður. Heimsmeistarar fá enga sérmeðferð og skákklukkan var einfaldlega sett af stað og Kovalev sat einn við borðið á meðan tími heimsmeistarans var að renna út.
Tímamörkin í hraðskákinni eru 3 mínútur til að byrja með og síðan bætast tvær sekúndur við hvern leik.
Þegar Carlsen átti síðan rúmlega 50 sekúndur eftir sást hann koma hlaupandi inn í salinn og náði að skákborðinu þegar hann átti rétt rúmlega 30 sekúndur eftir. Þá hóf hann leik og með ótrúlegum hætti vélaði hann Kovalev niður með sannfærandi hætti og vann skákina. Ekki liggur fyrir hvað gerðist en ljóst er að litlu mátti muna að Norðmaðurinn myndi tapa skákinni sem hefði orðið mikið áfall fyrir hann
Hér er hægt að sjá myndband af uppákomunni og sjálfri skákinni. Það er magnað að sjá hvað Carlsen er snöggur að hugsa.
Alls eru tefldar 21 skákir í heimsmeistaramótinu í hraðskák og tekur mótið tvo daga. Tólf skákir eru tefldar fyrri daginn og níu umferðir þann seinni. Alls eru tíu umferðum lokið í dag og er Carlsen efstur ásamt fjórum öðrum skákmönnum með átta vinninga, Bandaríkjamanninum Hikaru Nakamura, Rússanum Danil Dubov og Armenanum Haik Martirosyan.
Flestir telja að Nakamura komið til með að veita Carlsen harða keppni um titilinn. Magnus hefur fjórum sinnum hampað heimsmeistaratitlinum í hraðskák, síðast árið 2019 en Nakamura hefur aldrei unnið mótið þrátt fyrir að vera talinn einn allra besti hraðskáksmaður heims um langt skeið. Ríkjandi heimsmeistari er Frakkinn Maxime Vachier-Lagrave en hann er í hópi skákmanna með 6,5 vinninga – einum og hálfum vinningi á eftir efstu mönnum.
