Á mánudaginn leysti indónesíska lögreglan ráðgátuna um hvað varð um hina 54 ára Jahrah sem fór til vinnu á sunnudaginn en sneri ekki heim að vinnudeginum loknum. Hún starfaði á plantekru á Súmötru.

The Guardian segir að lík hennar hafi fundist í maga 7 metra langrar kyrkislöngu.

Jahrah fór til vinnu á sunnudagsmorguninn en þegar hún skilaði sér ekki heim tilkynnti eiginmaður hennar hvarf hennar til lögreglunnar. Mikil leit hófst þá og tók eiginmaður hennar þátt í henni. Hann fann skó hennar, jakka og verkfæri á plantekrunni.

Daginn eftir sást stór kyrkislanga á svæðinu og vaknaði strax grunur um að hún hefði orðið Jahrah að bana.

Hún var handsömuð og drepin. Þegar magi hennar var ristur upp fannst lík Jahrah að sögn lögreglunnar. TV2 skýrir frá þessu.

Kyrkislöngur eru ekki eitraðar en þær bíta fórnarlömb sín samt sem áður yfirleitt áður en þær vefja sig utan um þau og kyrkja. Þær velja sér yfirleitt lítil dýr sem bráð, sjaldgæft er að þær ráðist á fólk en það gerist þó öðru hvoru.

Fyrir fjórum árum gleypti kyrkislanga konu á indónesísku eyjunni Muna. Ári áður gleypti kyrkislanga bónda á eyjunni Sulawesi.

Kyrkislöngur halda yfirleitt til í regnskógum og fenjamýrum.