Antony Blinken, utanríkisráðherra Bandaríkjanna, sagði í gær að „sérhver notkun kjarnorkuvopna muni hafa skelfilegar afleiðingar“ og staðfesti að Bandaríkin séu tilbúin með áætlun ef svo hræðilega fer að kjarnorkuvopnum verði beitt.

Sky News skýrir frá þessu og segir að þetta komi fram í viðtali við Blinken í fréttaskýringaþættinum 60 Mínútur á CBS News.

Blinken vildi ekki segja hvað felst í áætlun Bandaríkjanna.

Hann sagði einnig að bandarískir embættismenn hafi hvatt ráðamenn í Kreml til að „hætta þessu blaðri um kjarnorkuvopn“ og að hann hefði áhyggjur af að enginn í innsta hring Vladímír Pútíns, Rússlandsforseta, þori að andmæla honum ef hann tekur ákvörðun um að beita kjarnorkuvopnum í Úkraínu.

Pútín hafði í hótunum í síðustu viku um að beita kjarnorkuvopnum ef Rússar telji að þeim sé ógnað og bætti við að hann væri „ekki að plata“.