„Þetta er galið, þetta eru galin áform. Kötluvikurinn getur ekki verið svona dýrmætur, það stendur ekkert undir svona flutningum nema gull eða fíkniefni.“ Þetta segir Guðni Ágústsson, fyrrverandi ráðherra og íbúi á Selfossi en hann er meðal fjölmargra Sunnlendinga sem eru ósáttir við og mótmæla fyrirætlunum þýsk-íslenska fyrirtækisins EP Power Minerals um stórfellda vikurflutninga langar leiðir á þjóðvegum landsins.

Fréttablaðið skýrir frá þessu í dag. Eins og fram hefur komið í fréttum þá eru uppi áform um að drekkhlaðnir vörubílar aki eftir Suðurlandsvegi frá Hafursey við Hjörleifshöfða til Þorlákshafnar. Munu bílarnir aka á fimmtán mínútna fresti allan sólarhringinn.

„Öll leiðin frá Vík til Þorlákshafnar neitar að þetta geti gerst. Þetta getum við Sunnlendingar ekki látið yfir okkur ganga,“ sagði Guðni í samtali við Fréttablaðið.

Hann benti á að gatnabrúnir á hluta vegkaflans kalli meira og minna á keðjunotkun vörubílanna allan veturinn. Þess utan beri vegurinn alls ekki svona mikla umferð og umferðaröryggi sé því stefnt í hættu.

Nánar er hægt að lesa um málið í Fréttablaðinu í dag.