„Mín upplifun var ekki sú að það hafi soðið upp úr milli mín og Gunnars. Sannleikurinn er sá að hann var hress og vildi faðma mig, sem var ekki gagnkvæmt. Þá kom á hann og hann fór. Að sjálfsögðu var Gunnar velkominn,“ segir Lilja Dögg Alfreðsdóttir, menningar- og viðskiptaráðherra, í samtali við DV.

Fyrr í dag kom fram í Orðinu á götunni að Lilja og Sigurður Ingi Jóhannesson, innviðaráðherra, stæðu í miðju moldviðri vegna atvika á gleðskap í tilefni af Búnaðarþingi. Kom fram að Sigurður Ingi væri sakaður um að viðhafa niðrandi ummæli um Vigdísi Häsler, framkvæmdastjóra Bændasamtakanna, og að soðið hafi upp úr milli Gunnars Þorgeirssonar, formanns samtakanna, og Lilju á sömu samkomu.

Eins og áður segir vísar Lilja því alfarið á bug að eitthvað slíkt hafi átt sér stað né þá, sem líka er hávær orðrómur um, að hafa hreinlega vísað Gunnari á dyr. „ Ég og Gunnar höfum tekist á undanfarið vegna Garðyrkjuskóla Íslands og ég hef ekki verið ánægð með framgöngu hans í þeirri vinnu. Ég legg mig fram um það að koma hreint fram og Gunnar er meðvitaður um þá skoðun mína. Ég hafði því ekki mikinn áhuga á faðmlagi frá honum í þessum gleðskap og sagði honum það einfaldlega,“ segir Lilja.

Hún segir að þá hafi komið á Gunnar og hann í raun hrökklast sjálfur út.  Hún segist hafa rætt við Gunnar í síma í dag og að þau hafi átt hreinskilið samtal um málið. „Það var ágætt að hreinsa loftið. Við munum hittast fljótlega á fundi og ég er fullviss um að við getum áfram átt faglegt samstarf,“ segir Lilja.