Bjarni Rúnar Heimisson sakar Bjarg íbúðafélag um hundafordóma. Ástæðan er sú að bannað er að vera með Schäfer-hunda í íbúðum félagsins. Bjarni hefur verið fremur lengi á biðlista eftir íbúð hjá Bjargi en nýlega rak hann augun í reglur félagsins um dýrahald, sem eru lítt áberandi á vef félagsins. Hefur hann í kjölfar þessa látið afskrá sig af biðlistanum.
Bjarg íbúðafélag er húsnæðissjálfseignarstofnun stofnuð af ASÍ og BSRB. Félagið er rekið án hagnaðarmarkmiða og er ætlað að tryggja tekjulágum fjölskyldum á vinnumarkaði aðgengi að öruggu íbúðarhúsnæði í langtímaleigu. Um er að ræða svokölluð leiguheimili að norrænni fyrirmynd.
Í reglum Bjargs um gæludýrahald segir:
„Hunda og kattahald er bannað í húsum/íbúðum Bjargs Íbúðafélags (Bjargs) nema ákveðnum skilgreindum íbúðum sem sótt er um og úthlutað sérstaklega. Annað dýrahald er bannað valdi það öðrum íbúum óþægjindum og ónæði.“ – Bannað er að hafa fleiri en eitt dýr í hverri íbúð og óheimilt er að halda fjölmargar hundategundir, meðal annars er þýski fjárhundurinn Schäfer á bannlista.
DV sendi fyrirspurn á Bjarg þar sem spurt á hverju reglur um útilokun tiltekinna hundategunda væru byggðar. Í svari segir:
„Við ákvörðun á hvaða hundategundir væru ekki heppilegar í fjölbýlum þar sem ólíkt fólk býr var leitað til sérfróðra aðila hvað varðar þessi mál. T.d. erum við að banna stóra hunda sem vakið gætu hræðslu og aðrar tegundir sem hættulegar eða óæskilegar eru að fenginni reynslu eða mati sérfróðra aðila. Íbúðir Bjargs eru heldur ekki mjög stórar og það þarf að horfa á það líka.“
Segir einnig að í myndinni hafi verið að banna allt dýrahald en ákveðið var að leyfa það með ákveðnum skilyrðum:
„Það þarf að vera með reglur í kringum dýrahaldið og það var mikið spáð í þessi mál þegar við fórum af stað í útleiguna hér. Sumir sem sækja um hjá okkur upplifa t.d. mikla hræðslu við stóra hunda og það þarf að líta til þeirra aðila líka, það eru alltaf ólík sjónarhorn og við reynum að mæta þeim flestum og eins og hægt er. Við hefðum getað ákveðið að banna gæludýrahald alfarið, en það var ákveðið að heimila það með þessum skilyrðum.“
Bjarni bendir á að það fari ekki eftir stærð hunda hvort þeir séu hættulegir eða ekki. „Þetta er stenst ekki skoðun. Hvergi í heiminum eru eins miklir fordómar gegn hundum og hér. Annaðhvort er dýrahald leyft eða ekki. Margir minni hundar geta verið meiri djöflar en stóru hundarnir,“ segir Bjarni sem bað um að verða afskráður af biðlistanum eftir að hann rak augun í reglurnar um dýrahald.
„Það sem ég vil leggja áherslu á í þessu máli eru þessir hundafordómar. Ég er með stóra Schäfer-tík og hún er ljúf eins og lamb og hefur aldrei gert neinum neitt. En sjálfur hef ég verið bitinn illa af smáhundi,“ segir Bjarni.
