Dómur er fallinn í máli Guðmundar Freys Magnússonar, 41 árs gamals Íslendings, sem varð unnusta móður sinni að bana á heimili þeirra í Torrvieja á Spáni 12. janúar árið 2020.

Í síðasta mánuði játaði Guðmundur morðið fyrir kviðdómi og mun það hafa verið virt honum til refsilækkunar. Var hann dæmdur í 17 ára fangelsi. Hann þarf jafnframt að greiða aðstandendum hins myrta 100.000 evrur í skaðabætur, sem er andvirði um 14,7 milljóna íslenskra króna. Þarf hann að greiða tveimur eftirlifandi börnum hins myrta 40.000 evrur hvoru og systur hans 20.000 evrur.

Frá þessu greinir spænski miðillinn Informacion. Í dómnum segir að sturlunarástand Guðmundar vegna mikillar fíkniefnaneyslu sé virt honum til refsilækkunar. En dómarinn sakar Guðmund einnig um grimmd og að hafa valdið unnusta móður sinnar óþarfa þjáningum með því að stinga hann margsinnis með hnífi og skilja hann eftir á lífi og blæðandi út.

Guðmundur viðurkenndi fyrir dómi í síðasta mánuði að hafa komið að heimili móður sinnar og kærasta hennar með þann ásetning að myrða manninn. Hann hafi klifrað yfri 2,5 m háan vegg til að komast að húsi móður sinnar og hins myrta. Hann viðurkennir að hafa klæðst hönskum til að hlífa höndum sínum, ennfremur að hafa tekið gaskút og brotið glerhurð með honum. Maðurinn, sem hafði vaknað við atgang Guðmundar Freys, fékk gaskútinn í sig. Guðmundur Freyr réðst síðan á manninn sem gat enga vörn sér veitt eftir að hafa fengið gaskútinn í sig. Stakk hann manninn margsinnis með hnífi þar sem hann lá í gólfinu. Móðir Guðmundar Freys reyndi að fá hann til að hætta árásinni en þá réðst hann á hana og veitti henni áverka. Guðmundur Freyr reyndi síðan að flýja af vettvangi en var handtekinn af spænsku lögreglunni er hann reyndi að flýja burtu á bíl. Morðvopnið, hnífurinn, fannst undir mottu í bílnum.

Sjúkraliðum á vettvangi tókst ekki að bjarga lífi fórnarlambsins.

Ekki komu vitni fyrir dóminn þar sem Guðmundur hafði áður játað sekt sína. Dómurinn var kveðinn upp fyrir 4-5 dögum.