Samkvæmt því sem veðurfræðingar segja þá var krafturinn í skýstrókunum sem gengu yfir Kentucky og nokkur önnur ríki á laugardaginn mjög mikill, einn sá mesti sem vitað er um. Einnig vörðu skýstrókarnir lengur en venja er og eyðileggingin er gífurleg og manntjónið er mikið.

Samkvæmt frétt Washington Post þá ætla veðurfræðingar nú að rannsaka sérstaklega hvað varð til þess að skýstrókarnir fóru yfir svo mörg ríki í Miðvesturríkjunum af svo miklum krafti. Þeir hafa sérstakan áhuga á að rannsaka hvort krafturinn í þeim eigi rætur að rekja til loftslagsbreytinganna en sú kenning hefur notið vaxandi fylgis margra veðurfræðinga á síðustu dögum.

Í Kentucky fór fimm skýstrókar yfir 320 kílómetra langt svæði, aldrei áður hafa skýstrókar farið yfir svo langt svæði, og skildu eftir sig slóð eyðileggingar. Sjónarvottar segja að heilu húsin hafi sópast upp með strókunum.

Bærin er eins og stríðssvæði. Mynd:Getty

Staðfest hefur verið að 88 létust í hamförunum en tuga er saknað. Meðal hinna látnu eru mörg börn. Þar á meðal tvö börn úr samfélagi Amishfólksins í Mayfield í Kentucky. Börnin bjuggu með foreldrum sínum i hjólhýsi í bænum. Foreldrar þeirra létust einnig en þrjú börn lifðu hamfarirnar af. „Þetta var svo frábær fjölskylda,“ sagði íbúi í bænum í samtali við Washington Post. Mayfield var einna verst úti og líkist einna helst stríðssvæði, svo mikil er eyðileggingin. Staðfest hefur verið að 74 létust í Kentucky.

Í Illinois létust að minnsta kosti sex manns þegar skýstrókur skall á vöruhúsi netverslunarinnar Amazon. Í Arkansas eyðilagðist elliheimili. Þar reyndi starfsfólk að bjarga heimilisfólkinu með því að leggjast ofan á það. í Missouri létust tveir.

Yfirvöld berjast við að koma hreinu vatni til hamfarasvæðanna og við að koma rafmagni aftur á. Ár geta liðið þar til uppbyggingu lýkur á þessum svæðum.