Í rúma tvo áratugi var morðið á hjónunum óleyst og þótti mikil ráðgáta en nú virðist lögreglan hafa leyst málið.
Maður á fimmtugsaldri var nýlega handtekinn og úrskurðaður í gæsluvarðhald, grunaður um að hafa myrt hjónin á sveitabæ í Brattås, sem er nærri Härnösand, 2005 að sögn sænskra fjölmiðla.
Það voru þau Tor Öberg, 70 ára, og Gerd Viklund, 67, sem voru myrt á heimili sínu. Lögreglan fann DNA úr meintum morðingja á vettvangi en þrátt fyrir umfangsmikla rannsókn og rannsóknir á DNA úr mörg hundruð manns tókst ekki að finna morðingjann.
Nýlega beitti lögreglan nýrri aðferð þegar hún leitaði að ættingjum morðingjans í DNA-gagnagrunnum og rakti sig síðan fram til hans. Þessari aðferð hefur mikið verið beitt í Bandaríkjunum en stutt er síðan heimilað var að beita henni í Svíþjóð.
Aftonbladet segir að hinn handtekin hafi lifað rólegu lífi árum saman í miðju landinu. Nágrannar hans segja hann hafa verið nánast ósýnilegan. Hann sé einfari sem hafi aldrei gefið sig að neinum.
Hann er einhleypur, barnlaus og hefur aldrei hlotið refsidóm. Tekjur hans hafa verið mjög lágar á síðustu árum að sögn sænskra fjölmiðla. Þeir segja hann hafa breytt nafni sínu skömmu áður en morðin voru framin. Hann bjó þá nærri heimili hjónanna. Hann hefur margoft flutt eftir það.
Maðurinn neitar sök.
