Hákarl varð manni á sextugsaldri að bana á Tuncurry Beach í New South Wales í Ástralíu í gær. Maðurinn var á brimbretti við ströndina þegar hákarlinn réðst á hann og beit hann í efri hluta annars lærisins.

Strandgestir sáu hvað gerðist og náðu að bjarga manninum í land en ekki tókst að bjarga lífi hans þrátt fyrir miklar tilraunir.

Í kjölfarið var öllum ströndum á svæðinu lokað og leit hófst að hákarlinum. Voru flygildi meðal annars notuð við leitina.

„Þetta hefur aldrei gerst áður. Ég veit ekki til að hákarl hafi ráðist á fólk á þessu svæði áður,“ sagði Brian Wilcox, yfirmaður Lower North Coast Surf Life.