Landsréttur staðfesti í gær gæsluvarðhaldsúrskurð yfir konu vegna síendurtekinna brota hennar. Um er að ræða 26 aðskild brot sem hún er ákærð fyrir. Mun konan því sitja í gæsluvarðhaldi til 16. nóvember klukkan 15. Úrskurður héraðsdóms féll 20. október, honum var áfrýjað 23. október og barst ekki Landsrétti fyrr en 26. október. Konan hafði því setið í gæsluvarðhaldi í sex daga áður en Landsréttur tók afstöðu til úrskurðarins.
Segir í úrskurði héraðsdóms sem Landsréttur staðfesti að konan sé undir rökstuddum grun um að hafa framið eftirfarandi brot á lögum á undanförnum vikum og mánuðum.
Meðal brota hennar eru ítrekaður þjófnaður á kardimommudropum úr hinum ýmsu verslunum bæjarins. Þá mun hún ítrekað hafa drukkið drykki á veitingastöðum sem ekki var greitt fyrir, auk þess sem að hún tók leigubíl fyrir á fimmta þúsund sem hún greiddi ekki fyrir.
Brotin eru framin á tímabilinu júní – september á þessu ári.