DV verður með beina textalýsingu af kappræðum Guðna Th. Jóhannessonar og Guðmundar Franklíns Jónssonar í kvöld. Kappræðunum verður sjónvarpað á RÚV og eru á dagskrá kl 19:35, eða strax að loknum kvöld- og veðurfréttum.

Kosið er á morgun, laugardag 27. júní.

Guðni mældist með 93,5% stuðning í síðustu skoðanakönnun Gallup sem birt var fyrir 3 dögum síðan. Þó stuðningsmenn Guðmundar og Guðmundur sjálfur hafi kæst yfir mikilli velgengni hans í skoðanakönnun Útvarps Sögu fyrr í dag þar sem hann mældist með 75,2% stuðning, má ætla að könnun Gallup sé nær raunveruleikanum. Eru stjórnmálaskýrendur á einu máli um að óvæntra úrslita sé harla að vænta þegar kjörkassar verða opnaðir annað kvöld.

Hvernig sem því líður, er þetta líklega síðasta tækifæri Guðmundar Franklíns til þess að snúa kjósendum í sína átt og því fróðlegt hverju hann mun tefla út. Guðni Th. Jóhannesson, forseti Íslands, hefur stigið varlega til jarðar hingað til í kosningabaráttunni. Virðist stefna Guðna og framboð hans hafa hingað til verið að sýna stillingu og erfitt hefur verið að gera greinarmun á frambjóðandanum Guðna og forsetanum Guðna. Örlítil breyting varð þó á því í Kastljósviðtali þar sem Guðni opnaði sig loks um árásir Guðmundar á Guðna er varða störf Elizu Reid, eiginkonu Guðna, hjá Íslandsstofu og svaraði þeim fullum hálsi.

Fróðlegt gæti því verið að sjá hvort Guðni taki frekar til varna í kvöld, eða hvort hann haldi áfram að láta orð og árásir Guðmundar sem vind um eyru þjóta.

DV verður á vaktinni og hefst bein textalýsing á slaginu 19:35.