Rétt rúmlega helmingur þeirra sem greindir hafa verið smit eru með hósta, um 40 prósent með hita. Með þessu móti hafa Þjóðverjar getað brugðist hratt við og veitt fólki viðeigandi meðferð og sett það í sóttkví. En það hefur einnig áhrif á tölfræðina að þeim mun fleiri sem eru rannsakaðir þeim mun lægri er dánartíðnin hlutfallslega.
Christian Drosten, yfirmaður smitsjúkdómadeildar Charité, sagði nýlega í samtali við dagblaðið Die Zeit að Þjóðverjar hafi einnig líklega byrjað fyrr að taka sýni úr fólki en aðrar þjóðir:
„Við uppgötvuðum faraldurinn mjög snemma í Þýskalandi. Við byrjuðum tveimur til þremur vikum fyrr en mörg nágrannaríki. Þetta tókst því við tökum svo mörg sýni. Okkur hafa örugglega yfirsést einhver smit en þannig er það alltaf. En ég held að okkur hafi ekki yfirsést stór faraldur. Fjöldi smita stígur eins og vænst var og það staðfestir þessa kenningu.“
Hann sagði að dánarhlutfallið muni hækka á næstunni því sífellt fleiri smitist og veikist og sumir þeirra, sem nú eru veikir, muni deyja.
