„Ráðhússkisinn hann Emil er allur. Hann lenti í slysi 10. september og kom illa leikinn í Ráðhúsið. Húsverðir Ráðhússins komu honum undir læknishendur en því miður var hann svo illa farinn að hann var svæfður.“

Þetta segir í tilkynningu frá Reykjavíkurborg og kemur þar fram að Emil hafi best liðið í fjölmenni og fann hann sér oft stað til að leggja sig á þegar haldnir voru fundir og móttökur í Tjarnarsalnum.

„Hér í Ráðhúsinu átti hann marga góða vini sem hann gladdi með komum sínum og uppátækjum,“ segir áfram í tilkynningunni. „Hann kom oft á borgarstjórnarfundi og tók þátt í að minnsta kosti tvennum kosningum. Megi sá sómaköttur hvíla í friði. Aðstandendum Emils færum við innilegar samúðarkveðjur.“

Fjölmargir minnast Emils á samfélagsmiðlum, á meðal þeirra eru Líf Magneudóttir, borgarfulltrúi VG, og Hildur Lilliendahl Viggósdóttir, verkefnisstjóri hjá Reykjavíkurborg.
„Ég kveð sómaköttinn Emil með söknuði og þökkum fyrir dásamleg kynni og fallegar samverustundir. Ég votta fjölskyldu hans samúð mína,“ skrifar Hildur.

Líf sendir þeim sem þóttu vænt um hann hugheilar kisukveðjur. „Við vorum miklir mátar. Spjölluðum og keluðum þegar við hittumst. Fórum einu sinni í mat saman. Ég á eftir að sakna hans,“ segir Líf.