Foreldrar Almars Smára Ásgeirssonar, sem sat um stutt skeið í gæsluvarðhaldi í Noregi, grunaður um hlutdeild í morðinu á Gísla Þór Þórarinssyni í síðasta mánuði, hafa sent frá sér yfirlýsingu þar sem þau lýsa yfir sakleysi sonar síns:
„Sonur okkar er frjáls vegna þess að hann er saklaus um aðild að morðinu á Gísla Þór Þórarinssyni. Hann var ekki á staðnum þegar það var framið og hann hringdi á hjálp um leið og hann vissi hvað hefði gerst.“
Gunnar Jóhann Gunnarsson, hálfbróðir Gísla, er grunaður um morðið, en Gísli var skotinn til bana. Almari Smára hefur nú verið sleppt úr haldi lögreglu en samkvæmt foreldrunum var hann ekki á vettvangi er morðið var framið, öfugt við það sem áður hefur verið haldið. Ljóst er af yfirlýsingu foreldranna að fjölskyldan hefur orðið fyrir áreiti vegna málsins. Þau segja að Almar Smári sé í losti og hann hafi verið beðinn um að tala ekki við fjölmiðla. Foreldrarnir segjast einnig ekki ætla að ræða við fjölmiðla. Enn fremur segir í yfirlýsingunni, sem birt er á Facebook:
„Vinsamlega beinið hatri ykkar að þeim sem sekur er um þennan hræðilega glæp. Við þá sem ég hef hingað til talið til vina minna vil ég segja þetta :
Vinsamlega hringið í mig og spyrjið ef þið eigið erfitt með að skilja einhvern hluta af þessari yfirlýsingu. Í rauninni hefðuð þið getað hringt í mig hvenær sem er þessa síðustu daga og spurt.
Vinsamlega deilið.“
