Vera Illugadóttir, fjölmiðlakona sem er einna þekktust fyrir hlaðvarpið Í ljósi sögunnar, hljóp allar göturnar í Reykjavík. Hún tekur nú stefnuna á Kaupmannahöfn.

Illugi Jökulsson, faðir Veru, greinir frá þessu í færslu á samfélagsmiðlum.

„Snillingurinn Vera dóttir mín er búin að vera að dunda við það í vetur á hlaupaæfingum sínum að hlaupa allar götur Reykjavíkur (hverja einustu!) og kláraði síðustu göturnar í Grafarholti nú um helgina,“ segir Illugi.

Hún eigi reyndar Kjalarnesið eftir, sem er tæknilega séð hluti af sveitarfélaginu Reykjavík eftir, en í staðinn tók hún allar göturnar á Seltjarnarnesi og í Kópavogi.

„Það sem barnið tekur upp á! Og nú er hún að fara að hlaupa í Kaupmannahöfn. Ég vona samt að hún láti sér nægja fyrirfram ákveðna hlaupaleið þar og fari ekki að hlaupa hverja einustu götu þar,“ segir Illugi.