Það hefur lengi verið vinsæl kenning meðal margra samsæriskenningasmiða og áhangenda þeirra að Rudolf Hess, staðgengill Adolf Hitlers, hafi ekki framið sjálfsvíg í fangelsi. Þeir halda því fram að það hafi verið tvífari Hess sem tók eigið líf.

En nú hefur þessi samsæriskenning verið afsönnuð af austurrískum vísindamönnum. Þeir gerðu dna-rannsókn á erfðaefni fjarskylds ættingja Hess og blóðsýni úr honum sem var tekið 1982.

Hess hengdi sig í Spandau-fangelsinu í Berlín 1987 en þá hafði hann setið þar í 40 ár. Hann var dæmdur í ævilangt fangelsi að síðari heimsstyrjöldinni lokinni. Hann var 93 ára þegar hann lést.

Í umfjöllun BBC kemur fram að vísindamenn við háskólann í Salzburg hafi gert fyrrgreinda rannsókn. Niðurstöðurnar pössuðu næstum 100% saman og því liggur ljóst fyrir að fangi nr. 7 í Spandau var Rudolf Hess og að það var hann sjálfur sem fyrirfór sér en ekki tvífari hans.

Einn af hvatamönnum dna-rannsóknarinnar var W. Hugh Thomas,  sem var læknir Hess í fangelsinu. Kenning hans gekk út á að maðurinn í Spandau hafi verið öðruvísi líkamlega uppbyggður en Hess og hafi þvertekið fyrir að hitta fjölskyldu sína árum saman. En þessi kenning var greinilega ekki á rökum reist.

Nýnasistar koma saman árlega til að minnast sjálfsvígs Hess en hann er eins og margir aðrir háttsettir nasistar í miklu dálæti hjá þeim.