Kviðdómur í Texas komst að þeirri niðurstöðu í gærkvöldi að Tanner Horner skyldi hljóta dauðadóm fyrir morðið á sjö ára gömlu Athena Strand árið 2022.

Horner, sem sinnti akstri fyrir FedEx á þeim tíma, játaði morðið þegar réttarhöld hófust í síðasta mánuði.

Athena hvarf frá heimili föður síns í Paradise í Texas að kvöldi 30. nóvember 2022 þar sem hún hafði verið úti að leika sér. Þegar stjúpmóðir hennar fór að svipast um eftir henni fann hún pakka frá Walmart á lóðinni sem innihélt Barbie-dúkkur sem Athena átti að fá í jólagjöf.

Sjá einnig: Kviðdómendur grétu við upptöku af síðustu augnablikum sjö ára stúlku

Leit að stúlkunni bar engan árangur og fannst lík hennar tveimur dögum síðar.

Horner hélt því áður fram að hann hefði óvart ekið á Athenu þegar hann afhenti pakkann. Hann sagðist í kjölfarið hafa sett hana inn í bílinn í örvæntingu, af ótta við að missa vinnuna eða sæta öðrum afleiðingum.

Saksóknarar drógu þá frásögn í efa og lögðu meðal annars fram myndskeið og hljóðupptökur úr bílnum.

Sjá einnig: Kviðdómur fékk að heyra hrollvekjandi símtal morðingjans við móður sína

Verjendur Horners lögðu áherslu á andleg og líkamleg veikindi hans. Þeir sögðu hann hafa verið greindan með Asperger-heilkenni á unga aldri og að hann hefði orðið fyrir blýeitrun í æsku sem mögulega hefði valdið heilaskaða og skertri dómgreind.

Kviðdómendur töldu hins vegar ekkert í bakgrunni hans eða framkvæmd brotsins réttlæta lífstíðardóm án möguleika á reynslulausn í stað dauðadóms.

Saksóknarinn James Stainton sagði við réttarhöldin að Horner hefði sagt „lygi eftir lygi eftir lygi“ í málinu, meðal annars með því að halda því fram að hann hefði óvart ekið á stúlkuna og síðan orðið henni að bana í örvæntingu.