Kári Kristjánsson er genginn í raðir Þróttar á nýjan leik eftir stutta dvöl hjá FH.
Þetta hafði legið í loftinu en hefur nú verði staðfest af báðum félögum. Kemur þetta nokkuð á óvart í ljósi þess að Kári var keyptur til FH frá Þrótti í vetur, eftir að hafa verið einn besti maður Lengjudeildarinnar.
„Kári kom að máli við okkur fyrir ekki svo löngu síðan og lýsti yfir vilja að fara aftur heim. Þróttarar voru tilbúnir að borga uppsett verð fyrir hann og í framhaldinu ákváðum við að leyfa leikmanninum að fara.
Í þeirri uppbyggingu sem við erum í er mikilvægt að leikmennirnir okkar séu tilbúnir að leggja allt í verkefnið og þegar sú er ekki raunin þá er betra að leikmaðurinn finni sér nýtt lið,“ er haft eftir Davíð Þór Viðarssyni, yfirmanni knattspyrnumála hjá FH, í tilkynningu félagsins.
Kári hefur komið við sögu í fjórum af fyrstu fimm leikjum FH í Bestu deildinni, þar af hefur hann byrjað tvo þeirra.
