Lögreglan á Norðulandi eystra hefur lokið rannsókn á kynferðisbrotamáli sem vakti landsathygli í marsmánuði. RÚV greinir frá.
Þrír menn voru handteknir við rannsókn málsins en ekki var krafist gæsluvarðhaldsúrskurðar. Voru þeir grunaðir um kynferðisbrot gegn konu á þrítugsaldri á hóteli í miðbæ Akureyrar. Þeim var sleppt að loknum yfirheyrslum.
Skarphéðinn Aðalsteinsson, yfirmaður rannsóknardeildar Lögreglunnar á Norðurlandi eystra, segir í samtali við RÚV að fleiri en einn séu með stöðu sakbornings í málinu en vildi ekki gefa upp hvað þeir væru margir. Rætt hafi verið við þó nokkra við rannsóknina.
Segir Skarphéðinn að ákvörðun verði tekin fljótlega um hvort ákært verði í málinu eða ekki.
Ekki náðist samband við Skarphéðinn við vinnslu þessarar fréttar.
Einn hinn handteknu var áhrifavaldurinn Kristján Einar Sigurbjörnsson, öðru nafni Kleini. Hann lýsti yfir sakleysi með stuttri færslu á samfélagsmiðlum: „Ég er saklaus af þeim ásökunum sem komið hafa fram. Ég mun ekki tjá mig frekar um málið á meðan það er til rannsóknar hjá lögreglu.“
