Ofþröng ferðamanna og slæm hegðun þeirra hefur nú leitt til sekta á vinsælum alþjóðlegum ferðamannastöðum, þar á meðal á stöðum sem eru vinsælir meðal Íslendinga.
Margir vinsælir áfangastaðir ferðamanna berjast með ferðamannasektum gegn fjölda ferðalanga sem hafa slæm áhrif á þá staði sem þeir heimsækja. Fjöldi ferðamanna getur aukið húsnæðiskostnað á viðkomandi stað, skapað öryggisáhættu og leitt til óstýrilátrar hegðunar þeirra. Í kjölfarið hafa margir áfangastaðir sett á ferðamannaskatta til að auka tekjur fyrir hagkerfi heimamanna og draga úr neikvæðum áhrifum ferðamanna.
Þar sem Ítalía stendur frammi fyrir einhverri mestu offerðamennsku í heiminum hafa nokkrar borgir, þar á meðal Róm, Feneyjar, Flórens, Mílanó og Napólí, innleitt ferðamannaskatta og greiðslu fyrir dagsferðir.
Samkvæmt Go Italy Tours, þá rukka sumar borgir ferðamannaskatt, sem farþegi greiðir beint á hótelið fyrir lok dvalarinnar. Upphæðin er mismunandi eftir tegund gistingar, árstíma og hvar á Ítalíu þú dvelur.
Róm hefur hækkað gjöld á undanförnum árum í kringum sögulega minnismerki sín. Að sitja, slaka á, borða, hanga eða jafnvel draga ferðatösku á eða nálægt Spænsku tröppunum getur leitt til sektar upp á rúmar 50 þúsund krónur að sögn ABC News.
Borgir eins og Feneyjar innheimta gesti sem gista yfir nótt í borginni rúmar 700 krónur í skatt fyrir fyrstu fimm nætur dvalar þeirra, sem borgin hefur gert síðan 2011. Árið 2024 innleiddi Feneyjar aðgangsgjald að sögufrægum miðbæ borginnar fyrir dagsgesti 14 ára og eldri til að draga úr mannþröng.
Ferðamenn gætu einnig lent í nýjum tegundum sekta. Til dæmis gæti sund í sögufrægu skurðunum í Feneyjum leitt til 65 þúsund króna sektar og 48 klukkustunda brottvísunar úr borginni.
Borgarskattur í Flórens er á bilinu 500 til 1200 krónur á mann á nótt, allt eftir gistingu, í allt að 10 nætur.
Í Portofino er einnig hætta á sektum frá 3600 til 72 þúsund krónur fyrir þá sem dvelja á almannafæri með ferðatöskur, lautarferðarbúnað eða færanlegan hátalara, allt eftir því um hvaða brot er að ræða. Borgin bannar einnig ferðamönnum að ganga berfættir um bæinn, sitja á torginu í sundfötum og stoppa við vinsæl útsýnisstaði á stöðum sem bjóða ekki slík stopp (e. No-waiting Zones). Þeir sem stífla flæðið á slíkum stöðum geta átt sekt yfir höfði sér upp á 40 þúsund krónur.
Nokkrar borgir hafa byrjað að skattleggja ferðamenn sem eru ekki viðeigandi klæddir og klæðast sundfötum þegar þeir fara af ströndinni. Cannes í Frakklandi, Feneyjar á Ítalíu, Barcelona á Spáni, Split í Króatíu, Sorrento á Ítalíu og Albufeira í Portúgal hafa öll innleitt sektir allt að 217 þúsund krónum gegn ferðamönnum sem klæðast sundfötum í borginni og hylja ekki nekt sína.
Það er einnig svokölluð „flip-flops sekt“ í löndum eins og Frakklandi, Grikklandi, Portúgal eða Spáni, sem grípur til aðgerða gegn þeim sem leigja bíl og klæðast flip-flops við akstur. Þótt það sé ekki beinlínis ólöglegt, ef umferðarlögreglan stöðvar einhvern og kemst að þeirri niðurstöðu að skór hans séu óöruggir, getur viðkomandi verið sektaður um allt að 30 þúsund krónur.
Frægar ferðamannaeyjar eins og Ibiza og Mallorca hafa einnig komið upp aðgerðum gegn „óhóflegri ferðamennsku“. Samkvæmt Sky News sagði Jaime Martínez, borgarstjóri Palma, að eitt af meginmarkmiðum sektanna væri að „leiðrétta ókurteist viðhorf ferðamanna“.
Ferðamenn sem drekka á götum úti á Baleareyjum á Spáni gætu átt yfir höfði sér sektir upp á 434 þúsund krónur. Sektir á bilinu 108 þúsund til 217 þúsund krónur ef drykkjan á almannafæri „truflar aðra nærstadda, felur í sér mannfjölda eða spillir ró umhverfisins“.
Dubrovnik í Króatíu fylgdi í kjölfarið og lagði á sektir upp á um 580 þúsund krónur fyrir ölvun á almannafæri. Borgarstjórinn Tomislav Šuta sagði við króatíska fjölmiðla að nýja sektin væri tilkomin vegna þess að „upp koma aðstæður sem skerða öryggi og lífsgæði íbúa.“
Barcelona hefur innleitt sektir fyrir ferðamenn sem brjóta gegn kyrrðartíma milli klukkan 23:00 og 7:00 til að reyna að takmarka ölvunarhegðun seint á kvöldin. Amsterdam og Prag hafa svipuð lög, svo sem bann við hátölurum, kráaröltum og bjórhjólum.
Í lok síðasta árs gaf Fodor’s út No List lista sinn fyrir árið 2026, þar sem áhersla var lögð á áfangastaði þar sem ferðaþjónusta „setur óviðráðanlegan þrýsting á landið og samfélögin á staðnum“. Ferðaskrifstofan lagði áherslu á að No Listinn væri ekki boð um sniðgöngu áfangastaðanna, heldur frekar væg áminning um að gefa ákveðnum vinsælum stöðum hlé frá ys og þys.
Á listanum voru Suðurskautslandið, Kanaríeyjar á Spáni, Jöklaþjóðgarðurinn í Montana, Isola Sacra á Ítalíu, Jungfrau-héraðið í Sviss, Mexíkóborg í Mexíkó, Mombasa í Kenýa og Montmartre í París í Frakklandi.
