Starfsmaður á leikskólanum Múlaborg, sem situr í gæsluvarðhaldi, grunaður um kynferðisbrot gegn barni í leikskólanum, er samkvæmt heimildum DV almennt vel liðinn.

Honum er lýst sem dálitlum einfeldningi en sagður vera blíður við börn og vel liðinn af þeim og samstarfsfólki.

Samkvæmt heimildum DV hefur maðurinn starfað á Múlaborg innan við tvö ár. Hann hefur ekki áður starfað á leikskóla en vann áður í stórmarkaði. Maðurinn er tæplega 22 ára gamall, hann á íslenskan föður og erlenda móður.

Sagður hafa játað

Samkvæmt frétt Vísis, sem greindi fyrst frá málinu, játaði maðurinn brotið í lögregluyfirheyrslu. Hann var á miðvikudag úrskurðaður í gæsluvarðhald til 20. ágúst, í þágu rannsóknar málsins.

Barnið sem varð fyrir meintu broti mannsins greindi foreldrum sínum frá atvikinu á þriðjudag. Sama dag var málið komið inn á borð lögreglu. Til skoðunar er hvort brotið hafi verið gegn fleiri börnum en ekkert liggur fyrir um það. Mun lögregla hafa tekið skýrslur af nokkrum börnum í tengslum við málið, væntanlega í Barnahúsi, þar sem slíkar skýrslutökur fara vanalega fram.

Samkvæmt heimildum Vísis fengu foreldrar barna á leikskólanum bréf frá skóla- og frístundasviði Reykjavíkurborgar á föstudagsmorgun þar sem þau voru upplýst um málið.

Sjá einnig: Jón Gnarr tjáir sig um kynferðisbrotamálið á Múlaborg – Á barnabörn á deildinni og furðar sig á viðbragðaleysi borgarinnar