Karlmaður sem er írskur ríkisborgari hefur verið ákærður fyrir líkamsárás í vegkanti á Reykjanesbraut í janúar 2024. Þolandinn, sem er karlmaður, hlaut rifbrot í árásinni.
Írinn er á fimmtugsaldri og með íslenska kennitölu en tekið er sérstaklega fram að hann sé með írskt ríkisfang. Hann er sagður vera með ótilgreint heimilisfang og þar af leiðandi hefur væntanlega ekki tekist að birta honum ákæruna í eigin persónu og því farin sú leið að birta hana í Lögbirtingablaðinu.
Samkvæmt ákærunni var árásin framin í janúar 2024 í vegkanti á Reykjanesbraut, í Vatnsleysustrandarhreppi en þar er væntanlega átt við Sveitarfélagið Voga eins og það heitir í dag.
Þolandinn er einnig karlkyns af erlendum uppruna og á svipuðum aldri og Írinn. Þolandinn er einnig með íslenska kennitölu en ekki er tekið fram að hann sé með ríkisfang í öðru ríki og því líklegt að hann sé íslenskur ríkisborgari. Samkvæmt ákærunni ýtti Írinn þolandanum með þeim afleiðingum að þolandinn féll í jörðina og sá írski lenti ofan á honum. Voru afleiðingarnar þær að þolandinn rifbrotnaði og buxur hans rifnuðu.
Þess er krafist í ákæru að Írinn verði dæmdur til refsingar og þar að auki krefst þolandinn 500.000 króna í miskabætur og 20.000 króna fyrir ónýtu buxurnar.
Skorað er á Írann að mæta fyrir Héraðsdóm Reykjaness þegar málið verður tekið þar fyrir í september næstkomandi. Geri hann það ekki má búast við því að það verði metið sem ígildi játningar. Hvort að Írinn mætir á hins vegar eftir að koma í ljós.
