Anna Kristín Ásmundsdóttir, leigubílstjóri hjá A-stöðinni, segir að erlendir bílstjórar hafi yfirtekið kaffiskúr leigubílstjóra á Keflavíkurflugvelli. Ekki nóg með það heldur hafi þeir einnig stolið áhöldum sem aðrir leigubílstjórar höfðu keypt inn.

Þetta segir Anna Kristín í samtali við Morgunblaðið í dag.

Nokkuð hefur verið rætt um stöðu mála á íslenskum leigubílamarkaði að undanförnu og vakti til dæmis athygli þegar greint var frá því hjá RÚV að kaffistofa leigubílstjóra á Keflavíkurflugvelli væri nú notuð sem bænahús af erlendum leigubílstjórum.

Anna Kristín rifjar upp að hún og annar bílstjóri hefðu í Covid-faraldrinum keypt eldhúsáhöld í skúrinn, til dæmis pottum, hnífapörum, glösum og diskumm

„Síðan í fram­haldi af því, þegar þeir byrja þarna, þá vaða þeir þarna í að nota okk­ar eig­ur og við segj­um: „Ókei, þeir eru bara bíl­stjór­ar eins og við og þeir mega það al­veg.“ Nema svo byrja þeir að stela hlut­un­um okk­ar þarna. Það er til dæm­is búið að stela grjóna­potti vin­konu minn­ar, eggja­suðutæk­inu mínu, öll­um disk­un­um, glös­un­um og hnífa­pör­un­um okk­ar,“ seg­ir Anna við Morgunblaðið í dag.

Í frétt Morgunblaðsins kemur fram að þeir leigubílstjórar sem ekki taka þátt í bænahaldinu forðist skúrinn enda líði þeim eins og þeir séu ekki velkomnir. En það er líka fleira, segir Anna Kristín.

„Við kom­umst ekki á kló­settið vegna þess að gólfið inni á kló­setti er renn­andi blautt, því að þeir eru með lapp­irn­ar uppi í vösk­un­um að þrífa þær fyr­ir bæna­hald. Það er bara viðbjóður þarna inni,“ hefur Morgunblaðið eftir henni.

Í aðskildri frétt Morgunblaðsins í dag er einnig rætt við Guðmund Daða Rúnarsson, framkvæmdastjóra viðskipta og þróunar hjá Isavia, sem segir að Isavia vilji að öllum líði vel sem stunda atvinnustarfsemi á svæðinu, óháð uppruna eða trú. Verið sé að skoða það að fá einstaklinga sem eru sérfróðir í fjölmenningarsamfélögum að borðinu til að fá leiðsögn svo hægt sé að bæta stöðuna.