Lögregluyfirvöld í Mjanmar hafa handtekið vinsælan stjörnuspeking. Spáði hann hörðum jarðskjálfta í sem aldrei raungerðist.
Tímaritið People greinir frá þessu.
Stjörnuspekingurinn John Moe The er mjög vinsæll í Mjanmar. Hann hefur meira en 30 þúsund fylgjendur á samfélagsmiðlinum TikTok. Hann er nú kominn upp á kant við lögregluyfirvöld og það kann ekki góðri lukku að stýra í herræðisríki á borð við Mjanmar.
Þann 9. Apríl síðastliðinn spái John Moe því að eftir tólf daga kæmi gríðarlega harður jarðskjálfti sem myndi skekja allar borgir Mjanmar.
„Fólk ætti ekki að vera í háum byggingum þennan dag,“ skrifaði John Moe í færslu með myndbandi á TikTok. Á myndbandið horfðu 3,3 milljónir manns. „Takið alla mikilvæga hluti með ykkur og hlaupið burt frá byggingum þegar það byrjar að skjálfa.“
Gríðarlega harður jarðskjálfti hafði nýlega riðið yfir landið, það er þann 28. mars. Var hann upp á 7,9 á Richterskala og hundruð eftirskjálfta fylgdu. Eyðileggingin í landinu var gríðarleg og vel á sjötta þúsund manns fórust sem og 67 manns í Tælandi og 1 í Víetnam. Auk gríðarlegra skemmda á nýlegum byggingum urðu miklar skemmdir á fornum minjum, svo sem musterum.
Það var því enginn húmor í landinu fyrir falsspá eins og John Moe bauð upp á á samfélagsmiðlareikningi sínum. John Moe, sem er 21 árs gamall, var handtekinn á þriðjudag á heimili sínu í borginni Monywa samkvæmt tilkynningu herforingjastjórnarinnar í Mjanmar.
„Við fengum ábendingu um falsfréttaflutning sem væri verið að dreifa á TikTok reikningi um að alvarlegir jarðskjálftar myndu ríða yfir,“ sagði í tilkynningunni. Ólöglegt er að dreifa falsfréttum í Mjanmar. „Við munum bregðast við þessu eins og lögin segja til um. Einnig munum við bregaðst við öllum sem skrifa eða dreifa falsfréttum.“
Í blaðinu er vitnað í viðtal við konu að nafni Nan Nan, sem býr í Yangon, stærstu borgar Mjanmar. Hún hafði séð færsluna hjá John Moe og ekki trúað henni. En hún þekkti fólk sem hafði trúað spádóminum, þar á meðal nágranna hennar.
„Flestir nágrannar mínir þorðu ekki að vera heima hjá sér og voru úti á götu allan daginn,“ sagði Nan Nan. „Vinur minn tók hús fyrir utan Yangon á leigu til að búa sig undir þetta.“
