Pep Guardiola mun samkvæmt enskum miðlum ræða við Khaldoon Al Mubarak, stjórnarformann Manchester City, fyrir helgina um ákvörðun sína að yfirgefa félagið eftir tímabilið.

Daily Mail greindi frá því að Guardiola hefði ákveðið að láta af störfum eftir tíu ára dvöl hjá City þar sem hann hefur skapað eitt sigursælasta lið í sögu ensku úrvalsdeildarinnar.

Manchester City missti nýverið af Englandsmeistaratitlinum þegar liðið gerði 1-1 jafntefli við Bournemouth og Arsenal tryggði sér toppsætið.

Guardiola sagði sjálfur eftir leikinn að hann vildi ræða málið fyrst við formann félagsins áður en nokkuð yrði opinberað.

„Fyrsti maðurinn sem ég þarf að tala við er stjórnarformaðurinn minn. Við munum ræða saman á næstu dögum,“ sagði Guardiola.

Spánverjinn útskýrði einnig hvers vegna hann hefði ekki viljað tilkynna ákvörðun sína fyrr á tímabilinu.

„Ef þú ert að berjast um titla og tilkynnir að þú sért að fara, þá hætta leikmennirnir að fylgja þér frá fyrstu stundu,“ sagði hann.

Manchester City hefur að sögn undirbúið sig fyrir mögulega brottför Guardiola um nokkurt skeið og Enzo Maresca hefur verið nefndur sem einn helsti kandídatinn til að taka við liðinu.