Það hefur ekki farið framhjá mörgum að Arsenal varð í gær enskur meistari í fyrsta sinn í 22 ár. Gríðarleg stemning var í London langt fram á nótt og göturnar fullar af glöðum stuðningsmönnum.
Þetta varð ljóst eftir 1-1 jafntefli Manchester City gegn Bournemouth í gær, en City getur nú ekki náð Arsenal að stigum í lokaumferðinni.
Leikmenn Arsenal horfðu á leikinn saman og fögnuðu gríðarlega í leikslok og vel fram eftir, ef marka má efni á samfélagsmiðlum.
Declan Rice, Bukayo Saka, Eberechi Eze og Jurrien Timber sáust til að mynda fyrir utan Emirates-völlinn klukkan fimm í morgun og fögnuðu þar ásamt þeim stuðningsmönnum sem eftir voru.
Tóku þeir myndir með þeim og virtust hvergi nærri hættir, eins og sjá má hér að neðan.
