Southampton gæti rekið knattspyrnustjórann Tonda Eckert eftir njósnahneykslið sem varð til þess að félaginu var hent úr umspili ensku B-deildarinnar.

Middlesbrough, sem tapaði undanúrslitaeinvíginu gegn Southampton, fær sæti í úrslitaleiknum gegn Hull eftir að sjálfstæð nefnd ensku deildarkeppninnar komst að þeirri niðurstöðu að Southampton hefði brotið reglur með því að njósna um æfingar liðsins fyrir undanúrslitaeinvígið.

Southampton fær einnig fjögurra stiga frádrátt sem tekur gildi í ensku B-deildinni á næsta tímabili.

Samkvæmt Talksport viðurkenndi Eckert sjálfur að bera ábyrgð á njósnunum, en slíkt sé algengara í þýska boltanum þar sem hann starfaði áður.

Eigandi Southampton, Dragan Solak, er sagður afar ósáttur enda gæti málið hafa kostað félagið möguleikann á sæti í úrvalsdeildinni og þeim gríðarlegu tekjum sem fylgja því.

Þá gætu bæði Eckert og yfirmaður knattspyrnumála hjá félaginu, Johannes Spors, átt yfir höfði sér mögulegt bann frá enska knattspyrnusambandinu. Enn á eftir að ákveða hvort þeir verði sérstaklega rannsakaðir.

Southampton hefur áfrýjað refsingunni en búist er við niðurstöðu úr því máli síðar í dag.