Ensku stórliðin Chelsea, Manchester United og Liverpool hafa öll augastað á Karim Adeyemi fyrir sumarið.
Hinn 24 ára gamli Adeyemi er á mála hjá Dortmund en verður samningslaus eftir rúmt ár. Þýska félagið mun því líklega skoða þann möguleika að selja hann í sumar til að fá pening fyrir hann.
Chelsea ku hafa haft samband við sóknarmanninn nú þegar en United og Liverpool fylgjast grannt með stöðunni.
Talið er að Dortmund vilji rúmar 50 milljónir punda fyrir leikmanninn í sumar, en hann hefur komið að 15 mörkum í 37 leikjum á leiktíðinni.
