Marcus Rashford er afar óvænt orðaður við Real Madrid í spænska blaðinu Sport.

Rashford er að klára eins árs lánsdvöl hjá Barcelona frá Manchester United, en honum hefur tekist að endurvekja feril sinn í Katalóníu og hjálpaði hann liðinu að tryggja sér Spánarmeistaratitilinn á dögunum.

Börsungar hafa kaupmöguleika upp á 26 milljónir punda í sumar, en það er samkomulag sem félagið gerði við United í fyrra. Talið er að Barcelona vilji þó reyna að semja við enska félagið um lægra verð.

Takist United og Barcelona ekki að semja vill Jose Mourinho, sem er að taka við Real Madrid á nýjan leik, skoða þann möguleika með forráðamönnum félagsins að kaupa Rashford.

Gæti enski sóknarmaðurinn reynst ódýr kostur í framlínuna með mikla reynslu af því að spila á hæsta stigi.

Það er þó afar óalgengt að menn spili fyrir bæði Barcelona og Real Madrid svo þetta verður að teljast ólíkleg niðurstaða.

Rashford er samningsbundinn United til 2028 en ekki er talið að hann muni klæðast treyju félagsins á ný.