Arsenal er Englandsmeistari í fyrsta sinn í 22 ár. Þetta varð ljóst eftir að Manchester City gerði jafntefli gegn Bournemouth á útivelli í úrvalsdeildinni í kvöld.

City náði sér í raun aldrei á strik í leiknum. Junior Kroupi, sem hefur slegið í gegn á leiktíðinni, kom Bournemouth yfir með glæsilegu skoti á 39. mínútu og þannig var staðan þar til í uppbótartíma, þegar Erling Braut Haaland jafnaði fyrir City. Þar við sat.

City mætir Aston Villa í lokaumferðinni og getur ekki lengur náð Arsenal, en fjögur stig eru á milli liðanna.

Arsenal heimsækir Crystal Palace á sunnudag, þar sem liðið tekur á móti Englandsmeistaratitlinum. Leikmenn og stuðningsmenn um allan heim munu hins vegar fagna í kvöld og næstu daga.

Gríðarlegur uppgangur hefur verið hjá Arsenal undir stjórn Mikel Arteta undanfarin ár. Hann kom liðinu aftur í Meistaradeildina og í titilbaráttu þrjú ár í röð, áður en liðið vann loks titilinn nú.

Bournemouth hefur átt frábært tímabil og hefur tryggt Evrópusæti.