Stærsti leikur tímabilsins til þessa í ensku úrvalsdeildinni fór fram í kvöld þegar Manchester City tók á móti Arsenal.
Það er óhætt að segja að þetta hafi verið leikur kattarins að músinni og yfirburðir City miklir frá upphafi.
Þeir báru árangur strax á 7. mínútu þegar Kevin De Bruyne skoraði með góðu skoti. Erling Braut Haaland fór illa með Rob Holding í aðdragandanum.
Áfram voru heimamenn miklu betri. Skytturnar virtust ætla að sleppa aðeins 1-0 undir í hálfleik en í uppbótartíma fyrri hálfleiks skoraði John Stones með skalla. Markið var upphaflega dæmt af vegna rangstöðu en VAR sýndi að það var gott og gilt.
Eftir innan við tíu mínútur í seinni hálfleik var City búið að gera út um leikinn. Þá skoraði De Bruyne aftur með frábærri afgreiðslu eftir samspil við Haaland.
Eftir þetta þæfði City leikinn niður. Holding tókst þó að klóra í bakkann fyirr Arsenal á 86. mínútu með góðri afgreiðslu í teignum.
Haaland kom sér hins vegar á blað og kom City í þriggja marka forystu á ný í blálok leiksins.
Lokatölur 4-1. Úrslitin þýða að Arsenal er enn á toppi deildarinnar, nú með 2 stiga forskot á City. Þeir síðarnefndu eiga hins vegar tvo leiki til góða og útlitið því gott fyrir þá.
