„Yfirlýsingar þingmanna Miðflokksins eru óafsakanlegar. Trúnaðarbrestur hefur átt sér stað milli þeirra, þings og þjóðar.“
Þetta segir Lilja Alfreðsdóttir menntamálaráðherra í yfirlýsingu á Facebook vegna frétta sem hafa birst í dag um þau ummæli sem sex þingmenn Miðflokksins og Flokks fólksins létu falla þann 20. Nóvember á Klaustri. Gunnar Bragi Sveinsson, þingmaður Miðflokksins, kallaði Lilju Dögg Alfreðsdóttur menntamálaráðherra og fyrrum flokksystur sína tík á fundinum alræmda á Klaustri. Klámkjafturinn var alls ráðandi í tali Gunnars, Sigmundar Davíðs og Bergþórs Ólassonar þegar talið barst að Lilju og klúryrði, bæði á íslensku og ensku látin falla. „Fuck that bitch“ og „Þú getur riðið henni“ heyrast greinilega.
Um yfirlýsingar Miðflokksins í kjölfarið segir Lilja:
„Það orðfæri og sleggjudómar sem orðið hafa tilefni fréttaskrifa í dag lýsa vanmætti, ótta og úreltum viðhorfum.“