Indland og Pakistan hafa lengi deilt um Kasmír-hérað og átti árásin sér stað á svæði sem er í dag undir yfirráðum Indlands. Indverjar hafa skellt skuldinni á yfirvöld í Pakistan vegna málsins en áður óþekktur uppreisnarhópur sem kallar sig Kashmir Resistance hefur lýst ábyrgð á voðaverkinu.
Myndbandið hér að neðan var tekið af ferðamanni um það leyti sem byssumenn hófu skothríð á hóp fólks sem var að njóta sín í blíðunni á þessum fallega stað.
Eins og sést var maðurinn, Rishi Bhatt, algjörlega ómeðvitaður um hörmungarnar fyrir neðan. Í myndbandinu heyrast skothvellir og ört vaxandi ringulreið meðal fólks sem átti fótum sínum fjör að launa.
Í viðtölum eftir árásina sagði Rishi að byssumennirnir hefðu hafið skothríðina skammt frá pallinum þar sem sviflínan fór af stað. Hefði hann verið þar ögn lengur hefði hann sennilega verið skotinn.
Yfirvöld í Indlandi segjast hafa borið kennsl á tvo af byssumönnunum og um sé að ræða einstaklinga frá Pakistan. Flestir hinna látnu voru ferðamenn frá Indlandi.
Í fréttum erlendra miðla kemur fram að árásarmennirnir hafi sagt fólki að fara með íslamskar bænir. Þeim sem það gátu var hlíft en hinir voru skotnir.
