Í síðasta mánuði fannst lík karlmanns í Claerwen uppistöðulóninu í Powys í Wales. Maðurinn var í blautbúningi og gæti hafa legið í lóninu í þrjá mánuði áður en hann fannst að sögn lögreglunnar.

Sky News skýrir frá þessu og segir að enn hafi ekki tekist að bera kennsl á líkið.

Krufning hefur farið fram. Maðurinn var á aldrinum 30 til 60 ára þegar hann lést. Hann var um 180 cm á hæð.

Hann var í Zone3 Agile blautbúningi og „gæti hafa verið látinn í þrjár til tólf vikur“ að sögn lögreglunnar.

Hefur lögreglan hvatt fólk til að hafa samband ef það býr yfir einhverjum upplýsingum um málið.