Lögregluyfirvöld á Nýja-Sjálandi rannsaka nú myndband sem sýnir mann á gangi með þrjú börn í óbyggðum landsins. Grunur leikur á að þarna séu á ferðinni Tom Phillips og börn hans sem ekkert hefur spurst til síðan í desember 2021.

Lögreglu hefur lengi grunað að Tom hafi flúið með börn sín, dæturnar Jaydu og Ember og soninn Maverick, út í óbyggðir Nýja-Sjálands og hefur fjöldi vísbendinga komið inn á borð lögreglu um að Tom hafi sést. Tekið er fram í umfjöllun Daily Mail að þetta sé þó langtrúverðugasta vísbendingin til þessa og hingað til hafi hann til dæmis ekki sést á ferð með börnum sínum.

Tom var búsettur í bænum Marokopa á vesturströnd Norðureyjar Nýja-Sjálands þegar hann hvarf skyndilega ásamt börnum sínum þann 9. desember 2021. Börnin þrjú eru 8, 9 og 11 ára. Hann er mjög vanur útivistarmaður og hafði áður farið með börn sín út í óbyggðir í nokkrar vikur án þess að láta nokkurn vita.

Fyrrnefnt myndband var tekið þann 3. október síðastliðinn og segist móðir barnanna, Catherine, að enginn vafi sé á því að þarna séu Tom og börnin á ferðinni. Segist henni vera létt að vita að þau séu á lífi.

Það voru menn sem voru á villisvínaveiðum sem tóku myndbandið og komu því til lögreglu. Síðustu daga hefur umfangsmikil leit farið fram á svæðinu en hún hefur enn sem komið er ekki skilað neinum árangri.