Mikill eldur braust út á stúdentagörðum í Halmstad í Svíþjóð á tíunda tímanum í gærkvöldi og logar enn. Lögreglunni barst tilkynning um átök á vettvangi klukkan 21.19. Þegar hún kom á vettvang fundu lögreglumenn alvarlega slasaðan mann utanhúss. Talið er að hann hafi verið stunginn með hníf eða álíka verkfæri. Hann var fluttur á sjúkrahús þar sem hann lést síðar.

Sænska ríkisútvarpið skýrir frá þessu auk annarra sænskra fjölmiðla. Fram kemur að karlmaður á fertugsaldri hafi verið handtekinn vegna málsins. Hann er grunaður um að hafa orðið manninum að bana og að hafa kastað einhverju inn á stúdentagarðana sem varð til þess að eldur kviknaði. Eins er saknað í brennandi húsinu.

Talsmaður lögreglunnar sagði í nótt að enn væri ekki búið að bera kennsl á hinn látna.

Íbúar á svæðinu segja að öflug sprenging hafi orðið áður en eldurinn kviknaði.

Vitni segja að hinn handtekni hafi komið akandi á vettvang og hafi kastað einhverju í húsið og síðan staðið öskrandi fyrir utan. Nokkrum sekúndum síðar varð sprenging.

30 íbúðir eru í húsinu en að minnsta kosti helmingur þess er brunninn. Slökkviliðið hefur verið með 10 bíla á vettvangi í nótt. Það náði tökum á eldinum um klukkan þrjú og er nú að ráða niðurlögum hans.