Í umræðum í sænska þinginu á miðvikudaginn kvað við nýjan tón hjá Löfven þegar hann var spurður af hverju hann gæti ekki séð samhengi á milli mikils fjölda innflytjenda í landinu og aukinnar afbrotatíðni.
„Ef fjöldi innflytjenda er svo mikill að við getum ekki aðlagað þá að samfélaginu er einnig aukin hætta á vandamálum eins og við sjáum núna,“
svaraði hann.
Hann endurtók síðan þennan boðskap síðar um daginn í Aktuellt þætti Sænska ríkissjónvarpsins en þá var hann aftur spurður hvort vaxandi starfsemi glæpagengja tengist innflytjendum.
„Við höfum tekið á móti svo mörgum innflytjendum að aðlögun þeirra að samfélaginu hefur misheppnast. Ef margir fullorðnir eru ekki í vinnu sjá börnin það og halda kannski að það sé eðlilegt. Þetta bætist við aðra samfélagslega spennu. Og já, þetta er vandamál,“
sagði hann og gat þess einnig að ríkisstjórn hans vinni nú að því að breyta útlendinga- og flóttamannastefnunni í Svíþjóð.
Ekki er langt síðan Mats Löfving, aðstoðarríkislögreglustjóri, sagði í samtali við Sænska ríkisútvarpið að fjölskylduglæpagengi væru stórt vandamál í landinu. Meðal annars kom fram að 40 glæpagengi stýri skipulagðri glæpastarfsemi í landinu.
„Öll fjölskyldan, öll ættin, öll klíkan elur börn sín upp til að þau geti tekið við stjórn gengisins. Þessi börn hafa ekki í hyggju að vera hluti af samfélaginu, allt frá fæðingu stendur metnaður þeirra til að taka við stjórn glæpastarfseminnar. Við erum ansi bláeygð hér í Svíþjóð,“
sagði hann meðal annars.
Í ágúst var 12 ára stúlka skotin til bana þegar hún var að viðra hundinn sinn nærri bensínstöð nærri Stokkhólmi. Fljótlega kom fram að stúlkan hefði orðið fórnarlamb átaka glæpagengja. Málið hefur sett mikinn þrýsting á sænsku ríkisstjórnina um að gera eitthvað varðandi mál glæpagengja sem virðast fara sínu fram að miklu leyti.
