Jöklar í Qilian fjallgarðinum í Kína bráðna ótrúlega hratt samhliða hnattrænni hlýnun. Þetta eykur áhyggjur af að vatnsskortur geti orðið að veruleika í framtíðinni. Stærsti jökullinn í þessum 800 km langa fjallgarði hefur hörfað um 450 metra síðan á sjötta áratugnum en þá var byrjað að fylgjast með honum. Hann hefur minnkað um 7% á þessum tíma og hefur bráðnunin færst í aukana á síðustu árum að sögn vísindamanna.

CNN skýrir frá þessu. Fram kemur að á þessum tíma hafi jökullinn misst 13 metra af þykkt sinni. Qin Xiang, sem hefur yfirumsjón með eftirlitinu með jöklinum, segir að hraði bráðnunarinnar sé sláandi.

Tíbeska hásléttan er stundum nefnd „þriðji póllinn“ vegna þess hversu mikill ís er þar. En frá sjötta áratugnum hefur meðalhitinn á svæðinu hækkað um 1,5 gráður að sögn Qin og ekki er að sjá að það muni draga úr hlýnuninni. Því er útlitið ekki gott fyrir þá 2.684 jökla sem eru í fjallgarðinum.