Það er auðvitað ekki auðvelt að bjóða sig fram í Bandaríkjunum ef fólk er ekki í Repúblikanaflokknum eða Demókrataflokknum en flokkarnir einoka stjórnmálalífið í landinu.
En auk Trump og Biden eru að minnsta kosti 1.218 aðrir sem sækjast eftir forseta- eða varaforsetaembættinu. Bandarískir fjölmiðlar segja að sjö þeirra hafi uppfyllt skilyrði til að fá nöfn sín á kjörseðlana í fleiri en 10 ríkjum. Enginn þeirra er þó talinn eiga minnsta möguleika á að sigra í þessum ríkjum og hvað þá í Bandaríkjunum sem heild. En það þýðir ekki að framboð þeirra geti ekki haft áhrif þegar atkvæði verða talin.
Þekktasti frambjóðandinn er væntanlega tónlistarmaðurinn Kanye West sem er í framboði fyrir eigin flokk, The Birthday Party. Hann hefur öðru hvoru lýst yfir stuðningi við Trump en ekki er alveg ljóst hvort hann styðji hann enn. Miðað við það sem segir á heimasíðu framboðs hans þá vill West tryggja trúfrelsi og að bænir verði aftur teknar upp í skólum landsins en Hæstiréttur úrskurðaði árið 1962 að það brjóti gegn stjórnarskránni að bænir séu hluti af skólahaldi. Að auki er hægt að kaupa hettupeysu á 160 dollara á heimasíðunni.
Jo Jorgensen er í framboði fyrir Libertatrian flokkinn sem segist vera með 600.000 meðlimi. Nafn hennar er á kjörseðlum í öllum fimmtíu ríkjunum. Hún og flokkurinn vilja samfélag þar sem ríkisvaldið hefur eins lítil afskipti af fólki og hægt er og að frelsi einstaklingsins verði mikið. Flokkurinn vill til dæmis leggja skattstofuna niður og leyfa neyslu fíkniefna.
Fyrir Græningja er Howie Hawkins í framboði en hann hefur áður skilgreint sig sem „stjórnleysingja og kommúnista“. Kannanir sýna að hann nýtur um 1% fylgis en Jo Jorgensen um 2%.
