Á undanförnum árum hafa stjörnufræðingar um allan heim mörgum sinnum tekið eftir lotum af örstuttum útvarpsbylgjum (sem nefnast fast radio burst á ensku). Fram að þessu hafa þeir ekki getað staðfest hvaðan merkin berast. Þau koma í lotum og hvert merki, bylgja, varir í minna en eina millisekúndu. Það er því ansi erfitt að rekja þau.

En nú hefur vísindamönnum frá Hollandi og Kanada tekist það. Með því að beina átta stórum útvarpssjónaukum að einu af þessum dularfullum merkjum, sem koma með reglulegu millibili, tókst þeim að rekja uppruna þeirra til vetrarbrautar sem er í um hálfs milljarðs ljósára fjarlægð frá jörðinni.

Þetta kemur fram í tímaritinu Nature.

Ekki er enn vitað með vissu hvað myndar þessar útvarpsbylgjur en stjörnufræðingar telja einna líklegast að þau komi frá litlum og þungum nifteindastjörnum.

Vegna óvissunnar sem hefur ríkt um upprunastað bylgjanna og hvað veldur þeim settu nokkrir vísindamenn fram kenningu fyrir nokkrum árum um að þau væru hugsanlega frá risastórum byggingum sem vitsmunaverur hefðu byggt.

En líklega má afskrifa þessa kenningu núna því uppgötvun stjörnufræðinganna sýnir svart á hvítu að merkin berast frá svæðum, þar sem stjörnur myndast, í vetrarbraut. Líklegast þykir því að nýjar nifteindastjörnur sendi þau frá sér.